Gida Hezkuntza Sailak eta Elhuyarrek egin dute, Tknika eta Berritze Nagusiarekin lankidetzan, eta hezkuntzako etapa eta arlo guztietako irakasleei zuzenduta dago. Dokumentu honek egungo egoerari erantzun nahi dio, teknologia mota horiek dituzten mugak eta «neutroak» ez diren tresna horiek sortzen dituzten zalantza eta dilema etikoak kontuan hartuta.
Gida ChatGPT, Gemini eta Glok AA sortzaileetatik abiatuta egingo da, eta 14 urtetik gorako ikasleekin aplikatuko da. Lana euskal zentro publikoetako 16 irakaslerekin eta IKTetan (Informazioaren eta Komunikazioaren Teknologiak) adituak direnekin kontrastatu da.
Gidak adimen artifizialaren (AA) erabilerari lotutako funtsezko hainbat alderdi lantzen ditu hezkuntzaren esparruan. Landutako gaien artean daude: AAren funtzionamenduari, haren arriskuei eta mugei buruzko azalpen bat, indarrean dagoen lege esparrua, irakasleei zuzendutako AAn oinarritutako tresnak hautatzeko irizpideak, eta chatbotak erabiltzeko gomendio espezifikoak.
Gainera, dokumentuak teknologia horiek hezkuntza-etapa eta curriculum-arlo desberdinetan aplikatzeko adibide praktikoak eskaintzen ditu, ikasgelan duten erabilerari buruzko jarraibide zehatzak barne. Gidan zehar, ikuspegi kritiko eta arduratsu baten garrantzia ere azpimarratzen da, eta hezkuntza testuinguru horietan AAren erabilerari lotuta egon daitezkeen arriskuak nabarmentzen dira.
